Sunday, September 22, 2013

മുസ്ലിം വിവാഹപ്രായം; 7 ചോദ്യങ്ങള്‍.

ചൂട് പിടിച്ച ചര്‍ച്ചകള്‍ സൈബര്‍ ലോകത്തും മാദ്ധ്യമങ്ങളിലും നടന്നു കൊണ്ടിരിക്കുന്നു. വിഷയം പ്രസക്തമാണ്. മുസ്ലിം  പെണ്‍കുട്ടികളുടെ വിവാഹ പ്രായം പതിനാറാക്കണം എന്നാവശ്യപ്പെട്ട് മുസ്ലിം സംഘടനകള്‍ കോടതിയില്‍ പോയതാണ് കാര്യം. നിയമം അനുസരിച്ച് പതിനെട്ടാണ് പെണ്‍കുട്ടികളുടെ കുറഞ്ഞ വിവാഹ പ്രായം, എന്നാല്‍ മുസ്ലിം പെണ്‍കുട്ടികള്‍ക്കുമാത്രം അത് പതിനാറാക്കണം എന്നതാണ് ഈ സംഘടനകളുടെ ആവശ്യം. ഇത് പൊതു സമൂഹത്തിന്റെ മുന്നില്‍ ഉയര്‍ത്തിക്കൊണ്ടുവരുന്ന നിരവധി ചോദ്യങ്ങളുണ്ട്.

1. മുസ്ലിം പെണ്‍കുട്ടികള്‍ക്കു മാത്രമായി അങ്ങനെയൊരു നിയമനിര്‍മാണം സാധ്യമാണോ?

2. ശരിഅത്ത് അനുസരിച്ചുള്ള കുറഞ്ഞ വിവാഹപ്രായം എത്രയാണ്, അതാണോ ഇന്ത്യന്‍ മുസ്ലിമുകള്‍ പിന്തുടരേണ്ടത് അതോ ഇന്ത്യന്‍ ഭരണഘടനയോ?

3. നമ്മുടെ സംസ്കാരത്തിനും പാരമ്പര്യത്തിനും അനുയോജ്യമായ കുറഞ്ഞ വിവാഹ പ്രായം പതിനാറാണോ?

4. ശാരീരികമായും മാനസികമായും ഇന്ത്യന്‍ സാഹചര്യങ്ങളില്‍ ഒരു പെണ്‍കുട്ടിക്ക് ആ പ്രായത്തില്‍ വിവാഹത്തിനുള്ള പക്വതയെത്തുമോ?

5. ഒരു പെണ്‍കുട്ടിയെ പതിനാറുവയസില്‍ തന്നെ കല്യാണം കഴിച്ചു വിട്ടാല്‍ എന്ത് ഗുണമാണ് സമൂഹത്തിനും പ്രത്യതാ ആ പെണ്‍കുട്ടിക്കും ഉണ്ടാവുക?

6. റോമന്‍ കത്തോലിക്കരുടെ നിയമം അനുസരിച്ച് കുറഞ്ഞ വിവാഹപ്രായം പെണ്‍കുട്ടികള്‍ക്ക് പതിനാലാണ്, അപ്പോള്‍ അതും അംഗീകരിച്ചു കൊടുക്കേണ്ടേ?

7. എന്തിനാണ് പതിനാറാക്കണം എന്ന് വാദിക്കുന്നത്, അതിലും കുറഞ്ഞാല്‍ എന്താണ് കുഴപ്പം; അതായത് പെണ്‍കുട്ടിക്ക് ആര്‍ത്തവം തുടങ്ങുന്ന പ്രായത്തില്‍തന്നെ വിവാഹം കഴിപ്പിച്ചു കൊടുക്കണം എന്ന് വാദിക്കാത്തതെന്താണ്?